Uwchraddio Canolfan Awyr Agored Rhyd Ddu

Mae’r prosiect hwn yn cael ei gyllido yn bennaf gan Gronfa Cefnogi Adfywio Cymunedau Llywodraeth y DU, drwy Gronfa Ffyniant Gyffredin y DU ac â weinyddir gan Gyngor Gwynedd. Antur Nantlle Cyf sy’n cyfrannu’r gweddill er mwyn cwblhau’r prosiect.

Diogelu'r presennol ac adeiladu tuag at y dyfodol

Bydd y prosiect hwn yn uwchraddio Canolfan Awyr Agored Rhyd Ddu – adeilad hanesyddol bwysig sydd dan berchnogaeth Cyngor Gwynedd ond â reolir gan Antur Nantlle Cyf ar drothwy Parc Cenedlaethol Eryri – er mwyn gwella safonau, cysur ac effeithlonrwydd ynni.

Bydd y gwaith i ddiogelu ac uwchraddio’r adnodd pwysig yma yn cael ei wneud er mwyn darparu llety o safon uwch i deithwyr a defnyddwyr lleol, ac ymestyn potensial economaidd yr ased. Bydd hyn nid yn unig yn cynyddu'r apêl i ymwelwyr ac ymestyn hyfywedd y Ganolfan fel un o ganolfannau twristiaeth cymunedol Eryri, ond hefyd yn helpu i leihau ôl troed carbon a chostau rhedeg yr adeilad i’r dyfodol.

Bydd y prosiect yn cyfrannu at gynaliadwyedd economaidd y fenter gymdeithasol sy’n ei redeg a’r gymuned gyfagos drwy gynyddu refeniw a defnydd.

Ers i’r Antur gymryd yr awenau yn 2015, mae dros 10,000 o westeion wedi aros yn y ganolfan, yn cynnwys ysgolion, colegau, grwpiau, elusennau a chymdeithasau lleol di-rif sydd yn derbyn telerau ffafriol. Rydym hefyd wedi denu ymwelwyr preifat o bob rhan o’r byd a hybu yr hyn sydd gan Ddyffryn Nantlle, Eryri, Gwynedd a gogledd Cymru i’w gynnig er mwyn ehangu’r budd economaidd.

Drwy weithio gyda chyflenwyr lleol, darparwyr gwasanaethau awyr agored lleol, busnesau arlwyo lleol a darparwyr gwasanaethau cynnal a chadw lleol, rydym wedi sicrhau fod effaith economaidd y Ganolfan yn un wirioneddol fuddiol i’r ardal.

Mae’r gwelliannau blaenorol yr ydym wedi ei gwireddu yma dros y blynyddoedd yn cynnwys creu Gardd Ddehongli i adrodd hanes a bywyd T.H. Parry-Williams a phwysigrwydd cenedlaethol Tŷ’r Ysgol i’r iaith Gymraeg. Rydym hefyd wedi gosod mesurau arbed ynni yn cynnwys paneli solar, batri a phwynt gwefru cerbydau trydan.

Fel cwmni cymunedol dielw, roedd lefel sylweddol y buddsoddiad oedd ei angen yn y Ganolfan tro yma tu hwnt i’n gallu. Mae’r adeilad yn hen ac mewn lleoliad sy’n agored i dywydd garw iawn ar adegau. Ein pryder oedd na fyddai modd cynnal y safonau ac felly y buddion economaidd a’r enw da sydd wedi ei feithrin yn ofalus dros nifer o flynyddoedd, ac heb gymorth y gronfa hon ni fyddai hynny wedi bod yn bosibl yn sicr.

Mae Cronfa Ffyniant Gyffredin y DU yn brif biler agenda Hybu Ffyniant Bro llywodraeth y DU. Nod y Gronfa yw gwella balchder mewn lle a chynyddu cyfleoedd bywyd ar draws y DU, buddsoddi mewn cymunedau a lle, gan gynorthwyo busnesau lleol, a phobl a sgiliau. I gael rhagor o wybodaeth, ewch i https://www.gov.uk/government/publications/uk-shared-prosperity-fund-prospectus.cy

Nod Cronfa Cefnogi Adfywio Cymunedau yw darparu cefnogaeth ddwys i gefnogi grwpiau mewn ardaloedd â chapasiti cymunedol isel drwy ariannu cynlluniau fydd yn dod a budd uniongyrchol. Mae’r cynlluniau yn rhai sydd wedi eu hadnabod fel blaenoriaethau yng nghynlluniau gweithredu lleol ‘Ardal Ni’.

Mae llwyddiant ein cais i'r gronfa uchod yn golygu y gallwn symud ymlaen gyda'r gwaith o ddiogelu ac uwchraddio’r adnodd pwysig yma yn cynnwys:

• gosod cegin newydd sbon yn cynnwys dau bopty newydd;
• gosod sustemau gwresogi newydd sydd yn fwy effeithlon a chynaliadwy;
• gosod sustemau goleuo newydd mwy effeithlon ble oedd angen;
• trawsnewid ystafelloedd ymolchi oedd yn methu â dal i fyny efo’r galw cynyddol;
• gorchuddio waliau mewnol gyda chladin arbenigol i gadw’r adeilad yn fwy deniadol ac addas ar gyfer defnydd gan grwpiau mawr;
• gwaith plastro mewnol ac allanol i atal tamprwydd a gwarchod yr adeilad rhag y tywydd i’r dyfodol;
• gosod lloriau newydd;
• gosod sustemau awyru mewnol arbenigol i atal tamprwydd;
• addurno mewnol a gwella delwedd yn gyffredinol.

Mae'r gwaith ar y gweill gyda'r disgwyliad bydd popeth wedi ei gwblhau erbyn diwedd Ionawr 2026.

Mae’r prosiect hwn wedi ei ariannu yn rhannol gan Lywodraeth y DU drwy Gronfa Ffyniant Gyffredin y DU sydd wedi ei arwain gan Cronfa Cefnogi Adfywio Cymunedau Cyngor Gwynedd.